Ministri i Drejtësisë Besfort Lamallari u takua sot me Sigrid Brettel, përfaqësuese e Komisionit Evropian, e cila mbulon Shqipërinë në Drejtorinë e Përgjithshme për Zgjerimin dhe Europën Lindore (ENEST). Brettel ishte e shoqëruar nga Ambasadori i Bashkimit Evropian në Shqipëri Silvio Gonzato.

Lamallari theksoi se “diskutuam mbi përparimin e deritanishëm, fokusin tek përmbushja e plotë dhe në kohë e angazhimeve të ndërmarra në kuadër të Kapitullit 23 “Gjyqësori dhe të Drejtat Themelore”, piketat e ndërmjetme, vijimin e bashkëpunimit dhe asistencës së BE për konsolidimin e gjyqësorit, duke synuar një ekuilibër të drejtë mes pavarësisë dhe llogaridhënies”

“Përparojmë me hapa të shpejtë dhe të qëndrueshëm drejt Bashkimit Evropian, si pjesë e zotimit të qeverisë “Shqipëria2030””, nënvizoi Lamallari.

Lamallari rreshtoi edhe prioritetet e Ministrisë së Drejtësisë si pjesë e programit qeverisës 2025-2029.

“Përafrimi i standardeve dhe legjislacionit në Kodin Penal, forcimi i kapaciteteve infrastrukturore dhe teknologjike të prokurorive dhe gjykatave, përdorimi i Inteligjencës Artificiale në procesin e transpozimit të Acquis dhe rritjes së cilësisë në hartimin e ligjeve si dhe Masterplani i Burgjeve dhe përmirësimi i kushteve të trajtimit të të paraburgosurve dhe të dënuarve janë prioritet madhor i veprimtarisë së Ministrisë së Drejtësisë, si pjesë e Programit Qeverisës 2025-2029”, shkruan Lamallari.

Burimi ATSH