Në Nju-Jork nisi sot debati i Sesionit të 80-të të Asamblesë së Përgjithshme të OKB-së.

Shqipëria përfaqësohet në këtë debat nga Presidenti i Republikës, Bajram Begaj si dhe ministrja për Europën dhe Punët e Jashtme, Elisa Spiropali.

Begaj u shpreh në një postim në rrjetet sociale se, pjesëmarrja në këtë Asamble është një mundësi për të forcuar angazhimin tonë të përbashkët për paqe, zhvillim të qëndrueshëm dhe mbrojtjen e të drejtave themelore të njeriut.

Ndërsa ministrja Spiropali u shpreh se, Shqipëria do të rikonfirmojë angazhimin e saj krah aleatëve strategjikë ndaj vlerave demokratike që na bashkojnë.

“Një tjetër ditë e rëndësishme nis në OKB, me Hapjen e Debatit të Përgjithshëm për paqe, zhvillim dhe të drejtat e njeriut, ku do të mbajë fjalën e tij edhe Presidenti Amerikan Donald Trump, e ku Shqipëria do të rikonfirmojë angazhimin e saj krah aleatëve strategjikë ndaj vlerave demokratike që na bashkojnë”, shkroi Spiropali në rrjetet sociale.

Presidenti amerikan Donald Trump ishte ndër të parët udhëheqës që mori fjalën në sesionin e 80-të të Asamblesë së Përgjithshme, ku do të adresohen sfidat e sigurisë globale.

Burimi ATSH