Drejtori i përgjithshëm i Autoritetit Kombëtar për Sigurinë Kibernetike, Igli Tafa, mori pjesë në panelin mbi “Sigurinë Kombëtare dhe Kërcënimet Hibride”, të zhvilluar në kuadër të konferencës së Ambasadorëve Diplo2025, me praninë e ambasadorëve shqiptarë nga mbarë bota.

Në fjalën e tij, Tafa theksoi rolin thelbësor të sigurisë kibernetike në arkitekturën e mbrojtjes kombëtare, veçanërisht në një mjedis ku sfidat hibride po bëhen gjithnjë e më komplekse dhe të ndërlidhura me dimensionet tradicionale të sigurisë.

Tafa nënvizoi domosdoshmërinë e forcimit të kapaciteteve institucionale, rritjen e bashkëpunimit ndërkombëtar dhe shkëmbimin e informacionit si elementë kyç për ndërtimin e qëndrueshmërisë kibernetike.

Gjithashtu, Tafaj prezantoi prioritetet strategjike të vendit në kuadër të Strategjisë Kombëtare për Sigurinë Kibernetike 2025–2030.

Gjatë tri ditëve, 7-10 shtator ambasadorët shqiptarë të akredituar nëpër botë morën pjesë në Tiranë në konferencën vjetore Diplo2025.

Me titull “Shqipëria 2030: në Evropë, e ndërlidhur me botën”, konferenca u zhvillua në formën e paneleve me pjesëmarrjen e ekspertëve vendas dhe ndërkombëtarë.

Diskutimet u fokusuan në integrimin evropian të Shqipërisë dhe të rajonit, diplomacinë ekonomike, si edhe në çështjet e sigurisë rajonale e globale.

Burimi ATSH