Në Ditën e Ashures, Kryegjyshi Botëror, Haxhi Dede Baba Edmond Brahimaj u bëri thirrje besimtarëve të garojnë për vepra të mira, si dhe të ruajnë njerëzimin, vlerat dhe familjet e tyre.

“Garoni për vepra të mira, dhe nxitoni të shfrytëzoni mundësi për vepra të mira. Në këtë ditë të shënuar, detyra jonë është të ruajmë njerëzimin, vlerat, familjen, virtytet, mirëqenien shpirtërore dhe mendore”, tha Baba Mondi përpara besimtarëve.

Në këto kohë konfliktesh të shumta nëpër botë, Kryegjyshi Botëror bëri thirrje që konfliktet dhe luftërat të ndalen, për t’i lënë vendin paqes. Baba Mondi kujtoi se detyrat tona, por mbi të gjitha detyrat e udhëheqësve tanë janë përpjekjet për liri, paqe dhe demokraci.

“Lutemi që njerëzimi të gjejë paqe, mirësi, të pushohen konfliktet dhe luftërat, si dhe të ecim drejt zhvillimit të demokracisë. Sytë tanë duhet të shkojnë drejt lutjeve ndaj Zotit”, tha ai.

Dita e Ashures është një ditë e veçantë për të gjithë bektashinjtë në të gjithë botën. Baba Mondi kujtoi se Profeti na tregon që Muharremi është një muaj i shenjtë dhe si tillë, mëkatet e kryera gjatë Muharremit peshojnë shumë rëndë dhe veprat e mira shpërblehen më bujarisht.