Fundjava e fundit e qershorit solli sërish Funar Fest, një nga aktivitetet më të dashura për banorët dhe vizitorët, që për të disatin vit radhazi mbush me jetë dhe energji zonën piktoreske të Funarit, vetëm pak kilometra larg qytetit të Elbasanit.

Festa që promovon turizmin aktiv, dashurinë për natyrën dhe mikpritjen elbasanase, u organizua nën kujdesin e veçantë të kryetarit të Bashkisë Elbasan, Gledian Llatja, i cili prej vitesh ka vënë në fokus zhvillimin e Funarit përmes investimeve në infrastrukturë, rrugë, sinjalistikë turistike dhe mbështetje për ekonominë lokale. Këto përpjekje po e kthejnë zonën në një destinacion gjithnjë e më të kërkuar për turizmin natyror dhe aventuror.

Pjesë e festës ishin edhe deputetët Aulona Bylykbashi, Adi Qose dhe Agron Gaxho, të cilët përshëndetën të pranishmit dhe theksuan rëndësinë e ruajtjes së trashëgimisë natyrore dhe mbështetjes për nisma të tilla.

Panairi me produkte bio të banorëve të zonës, koncertet me këngëtarë të njohur lokalë, si dhe aktivitetet sportive si vozitje me kajak në liqenin e Funarit e bënë këtë ditë një përvojë të paharrueshme për vizitorët, mes tyre edhe turistë zviceranë që vlerësuan cilësinë e organizimit dhe bukurinë e natyrës shqiptare.

Një tjetër zhvillim i rëndësishëm në këtë zonë ka qenë edhe hapja e bujtinave gjatë viteve të fundit, ku banorët, me mbështetjen e qeverisë, kanë kthyer banesat e tyre tradicionale në ambiente pritëse për turistët, duke ofruar kushte të përshtatshme dhe mikpritje karakteristike për udhëtarët, kryesisht të huaj. Ky transformim ka sjellë gjallërim ekonomik dhe ka rritur më tej interesin për turizmin rural në Funar.

Funar Fest është tashmë një traditë e përvitshme që jo vetëm feston, por edhe forcon identitetin dhe potencialin turistik të Elbasanit, duke e vendosur Funarin në hartën e destinacioneve më të veçanta për t’u vizituar në Shqipëri.

Burimi ATSH