Aplikacioni TEA, i krijuar që prej qershorit 2023, është një mundësi e mirë që turistët vendas e të huaj të njihen me të gjitha dimensionet e ofertës turistike të Shqipërisë.

Kryeministri Edi Rama ndau në rrjetet sociale momente nga puna e stafit të Agjencisë Kombëtare të Turizmit, të cilët informojnë turistët e huaj që vizitojnë vendin tonë rreth këtij aplikacioni.

“Stafi i Agjencisë Kombëtare të Turizmit ndodhet në çdo portë hyrëse të vendit për t’u prezantuar vizitorëve bukuritë që Shqipëria ka për të ofruar: nga deti në male, nga qytetet historike te plazhet mahnitëse. Shkarko tani aplikacionin TEA – udhërrëfyesi digjital 360˚ i Shqipërisë turistike”, shkruan Rama.

Aplikacioni TEA, i vetmi udhërrëfyes digjital i Shqipërisë turistike, është një shembull i shkëlqyer sesi teknologjia mund të përdoret për të përmirësuar dhe modernizuar përvojën turistike, duke ofruar informacion të shpejtë, të saktë dhe të përshtatur për turistët.

Që nga prezantimi i tij, ky aplikacion u ka mundësuar turistëve të kenë një përvojë më të pasur dhe të lehtë në eksplorimin e destinacioneve turistike të vendit.

Me TEA, turistët njihen me destinacione të ndryshme turistike të Shqipërisë, me monumentet historike, aktivitetet kulturore dhe artistike, por edhe marrin informacion mbi shërbimet të nevojshme për turistët, si: hotele, bare e restorante, kontakte, etj.

Ky aplikacion është i disponueshëm falas në Apple Store dhe në Play Store dhe është projekt i Ministrisë së Turizmit dhe Mjedisit dhe i Agjencisë Kombëtare të Turizmit.