Në Ministrinë e Drejtësisë u zhvillua sot mbledhja e radhës e Komitetit Ndërministror për Tokën, ku u miratua udhërrëfyesi për digjitalizimin e Agjencisë Shtetërore të Kadastrës 2025–2028.

Ministri i Drejtësisë, Ulsi Manja e cilësoi miratimin e këtij udhërrëfyesi si një hap thelbësor për të garantuar siguri juridike dhe administrim modern të pronës.

Manja nënvizoi se me ketë udhërrëfyes i jepet fund fund pasigurisë dhe zvarritjeve si dhe ndërtohet një sistem i drejtë, transparent dhe tërësisht i digjitalizuar, në përputhje me standardet më të mira evropiane.

“Shqipëria drejt një sistemi pronësie evropian. Tokës i japim drejtësi, qytetarëve siguri”, theksoi Manja ndër të tjera në një postim në rrjetet sociale.

Ky dokument vjen si rezultat i një analize të thelluar për modernizimin e shërbimeve të regjistrimit të pasurive, duke përcaktuar hapat konkretë proceduralë dhe teknikë, si dhe angazhimet institucionale të nevojshme për përmbushjen e objektivave të projektit.

Paralelisht, projekti fokusohet edhe në përmbylljen me sukses të procesit të regjistrimit fillestar në të gjithë territorin e Shqipërisë, një proces jetik për sigurinë juridike të pronësisë dhe zhvillimin ekonomik të vendit.

Burimi ATSH