Qeveria synon të forcojë përfshirjen e inteligjencës artificiale në ekonomi dhe administratë, duke e konsideruar këtë investim si një hap drejt një të ardhmeje teknologjike dhe ekonomike më të avancuar për vendin.

Ministri i Financave, Petrit Malaj, prezantoi në seancën plenare të Kuvendit Aktin Normativ për rishikimin e parë të buxhetit 2025 përmes së cilit akordohet një fond prej 1 miliard lekësh në mbështetje të startup-it të Inteligjencës Artificiale “Thinking Machines Lab”, themeluar nga Mira Murati, ish-drejtoreshë Teknologjike e OpenAI.

Ky fond i akorduar përmes një Akti Normativ, u sigurua nga rritja e të ardhurave jotatimore nga pasuritë e konfiskuara.

Sipas ministrit Malaj, investimi kanalizohet përmes Korporatës së Investimeve Shqiptare (KISH) dhe synon të mbështesë pjesëmarrjen e Shqipërisë në një projekt me potencial të lartë zhvillimi në fushën e teknologjisë dhe inovacionit.

Thinking Machines Lab është një kompani që po mbështetet nga investitorë të mëdhenj globalë si Andreessen Horowitz, Sequoia Capital dhe synon të arrijë vlerësime mbi 10 deri në 50 miliardë USD. Kompania zhvillon sisteme AI të avancuara dhe bashkëpunuese që integrojnë tekst, pamje, audio dhe ndërveprim.

Malaj theksoi se ky investim është një mundësi strategjike për Shqipërinë për të rritur profilin e saj ndërkombëtar në fushën e inovacionit dhe për të mundësuar bashkëpunime konkrete për transferim njohurish, projekte pilot dhe mbështetje për startup-et shqiptare në teknologji.

Ndërsa sa i takon aspektit të ligjit të buxhetit 2025, ndryshimet e miratuara ruajnë pa prekur deficitin buxhetor, i cili vazhdon të qëndrojë në nivelin rreth 68 miliardë lekë, sikundër është miratuar edhe në buxhetin fillestar 2025.

Burimi ATSH