Milan njoftoi sot emërimin e Igli Tares si drejtor sportiv i ekipit të parë.

Ai do t’i raportojë drejtpërdrejt drejtorit ekzekutiv të Klubit, Giorgio Furlani.

I lindur në Vlorë, më 25 korrik 1973, Tare ka përvojë të gjerë në futbollin profesionist italian, pasi ka luajtur për Brescia-n, Bologna-n dhe Lazion.

Pasi u tërhoq nga karriera e tij si lojtar, ai punoi si një drejtues i profilit të lartë, duke shërbyer si drejtor sportiv i S.S. Lazio – për më shumë se 15 vjet.

Ai kontribuoi ndjeshëm në sukseset e fundit të Klubit, duke përfshirë tre tituj të Kupës së Italisë dhe tre Superkupa Italiane.

“Jemi të kënaqur të mirëpresim Igli Tare në familjen Rossoneri. Ai është personi i duhur për të nisur rifillimin tonë: kompetenca, vendosmëria dhe vlerat e forta, të kombinuara me një kuptim të thellë të futbollit italian dhe një vizion ndërkombëtar, e bëjnë atë personin ideal për të mbështetur kapitullin e ardhshëm të Klubit, përmes zhvillimit të një projekti ambicioz sportiv”, tha drejtori ekzekutiv i AC Milan, Giorgio Furlani.

“Të bëhesh pjesë e një Klubi si AC Milan është një burim krenarie dhe përgjegjësie të madhe. Falënderoj Klubin që më besoi këtë rol. Klubi e njeh vendosmërinë time të fortë dhe dëshirën time për të pasur sukses: Do t’ia kushtoj të gjithë përvojën time shërbimit ndaj këtij Klubi të madh, i cili është i vendosur të kthehet në krye të futbollit italian dhe evropian”, tha Tare.

Burimi ATSH