Kryeministri Edi Rama priti sot në një takim kryeministrin e Finlandës Petteri Orpo, i cili ndodhet në Tiranë në kuadër të Samitit të Komunitetit Politik Evropian, që do të mbahet nesër në Tiranë.

Kryeministri Rama ndau në rrjetet sociale foto nga ky takim, ndërsa bëri të ditur se u diskutua mbi forcimin e bashkëpunimit dypalësh dhe sfidat e përbashkëta europiane.

“Kënaqësi të mikprisja kryeministrin e Finlandës Petteri Orpo, teksa diskutuam mbi forcimin e bashkëpunimit dypalësh dhe sfidat e përbashkëta europiane”, shkruan Rama.

Më herët gjatë ditës së sotme kryeministri Edi Rama priti në një takim dypalësh kryeministrin e Britanisë së Madhe, Keir Starmer, e para vizitë zyrtare e një kryeministri britanik në Shqipëri.

Rama priti në takim edhe kryeministrin e Armenisë Nikol Pashinyan, i cili viziton vendin tonë në kuadër të Komunitetit Politik Evropian.

Po ashtu, kryeministri priti në takim presidentin e Këshillit Europian Antonio Costa, me të cilin dolën edhe në një konferencë të përbashkët për shtyp.

Liderët e Këshillit Europian dhe të Bashkimit Europian do të mblidhen sot në një darkë pune në Tiranë me udhëheqësit e rajonit të Ballkanit Perëndimor, ndërkohë që nesër do të zhvillojë punimet Komuniteti Politik Europian.