Kryeministri Edi Rama, njëherësh kryetar i Partisë Socialiste deklaroi sot se, vota e popullit të Kavajës dhe Rrogozhinës për Partinë Socialiste, në numrin 5, në zgjedhjet e 11 majit, do të kthehet në pesëfishim të mbështetjes gjatë një mandati.

Në takimin përmbyllës elektoral për zgjedhjet e 11 majit, në Kavajë, Rama tha se, në këto vite qeverisje, ne mezi e nxorëm Kavajën nga këneta dhe hapëm vijën ujore për ta lidhë Kavajën me detin.

Rama u shpreh se fitorja e PS, në zgjedhjet e 11 majit, nuk është e lidhur me fitoren e vetëm kësaj partie por, ajo është e lidhur me mesazhin që ne populli shqiptar duam të bëhemi pjesë e BE-së.

“Neve nuk na duhet e një shumicë aritmetike, na duhet fryma e bashkimit e shprehur në një shumicë shqiptare, që kur të vijnë të gjithë ata burra nga e gjithë Europa në Tiranë në 16 maj ta marrin shumë të fortë mesazhin e 11 majit, që ne populli shqiptar duam të bëhemi pjesë dhe anëtarë të bashkisë së popujve të gjithë europës”, u shpreh Rama.

Kryeministri Rama tha se, duhet të jetë një shtysë e madhe dhe për këtë duhet të kontribuojmë të gjithë.

“Dua t’i them të gjithë prindërve demokratë, vijoi ai, që kanë fëmijë sot në kopshte e shkolla. Ajo çfarë ju mund t’i dhuroni fëmijëve, është duke u angazhuar në zgjedhje, që t’i jepni fëmijëve tuaj pasaportën europiane. Nuk na e dhanë dot ne, prindërit tanë, dhe gjyshërit nuk ia dhanë dot prindërve tanë dhe kështu në histori mbetëm të huaj për Europën. Ndërkohë që me këtë pasaportë, fëmijët e këtij vendi mund të shkojnë në çdo universitet dhe shkollë me të njëjtat kushte dhe shpenzime njësoj si fëmijët europianë”.

Sipas Ramës, vota për PS, është votë për anëtarësimin në BE përtej preferencave politike.

“Kjo është një arsye më shumë për ta bërë, se kur t’i japin pasaportën e BE fëmijës nesër, do të thoni, që e kam dhënë votën për atë që nuk e shihja me sy, por e kam bërë për ty, fëmija im”, deklaroi Rama.

Burimi ATSH