Kryeministri Edi Rama ishte sot në fabrikën “Next Generation Perfumes” në Durrës, ku parfumet “Made in Albania” janë dëshmia se si cilësia shqiptare po depërton në tregjet europiane, duke sjellë një histori suksesi që tregon fuqinë e investimeve të huaja në Shqipëri.

Në takim me sipërmarrësit holandezë dhe punonjësit e kësaj fabrike, Rama vlerësoi se “mbështetja për sipërmarrjet që investojnë dhe krijojnë zhvillim është rruga drejt një ekonomie më të fortë”.

“Më vjen jashtëzakonisht mirë që pashë nga afër këtë realitet që është një realitet model, i cili u vlerësua edhe nga sipërmarrësi holandez, i cili foli me superlativa për punonjëset dhe paralelisht edhe specialistët, inxhinierët kimistë, pra për gjithë krahun e ekspertizës. Tha shprehimisht se nuk e kishte imagjinuar se në Shqipëri do të gjente burime njerëzore të kësaj cilësie”, tha Rama.

Kryeministri vlerësoi faktin se ky nuk është thjesht një realitet i bukur në dukje, ku prodhohen produkte të cilësisë së lartë, por është një realitet ku ata që i prodhojnë paguhen denjësisht me një pagë minimale 700 euro dhe pagë mesatare 900 euro.

“Ndaj edhe kompania nuk ka problem në gjetjen e punonjësve, por përkundrazi, ka radhë për të hyrë në punë këtu”, tha Rama.

Po ashtu, Rama solli në vëmendje se në këtë kompani respektohen ditët e pushimit për punonjësit, një sistem që sipas tij do të imponohet edhe në kompanitë e tjera.

“Nga ana tjetër më vjen shumë mirë që ambasadori më përmendi që kjo kompani është këtu në zhvillim e sipër dhe që është e kënaqur. Ne do ta mbështesim fort në çdo hap kompaninë, sepse ka një plan për t’u zhvilluar, për të marrë më shumë punonjës dhe njëkohësisht për të zgjeruar më shumë hapësirat e punës”, shtoi Rama.

Ndërkohë kompania “Next Generation Perfumes” njofton dhe ambicien për të zgjeruar aktivitetin, duke rritur investimet në Shqipëri dhe duke shtuar linjat e prodhimit, çka do përkthehet me shtim të ardhurash, shtim të vendeve të punës.