Mbi 100 subjekte shqiptare lider të investimeve në shumë fusha, do të ofrojnë mundësi punësimi për shqiptarët që jetojnë në Greqi, në panairin e parë të Punës, “Puno dhe jeto aty ku ke zemrën”, që zhvillohet më 2 mars në Athinë, Technopolis City (Gazi) Greqi.

Panairi i Punës dhe Aftësive çelet sot në Tiranë, dhe menjëherë më pas, për herë të parë, Panairi shqiptar i Punës udhëton në Athinë, ku në datë 2 mars, në Qendrën Technopolis City (zona Gazi), pranë stacionit të metrosë Keramikos.

Ministri i Ekonomisë, Kulturës dhe Inovacionit, Blendi Gonxhja ndërsa ftoi bashkëatdhetarët në Greqi për t’u njohur me perspektivën e kthimit të plotë a të pjesshëm me punë në atdhe, përmes një dere të re komunikimi me diasporën tonë për të lidhur profesionistët dhe të rinjtë atje me mundësi konkrete punësimi në tregun shqiptar të punës.

Kjo jo pa qëllim tani, vijoi Gonxhja, sepse Shqipëria përgatitet të çelë sezonin turistik dhe ekonomia jonë po njeh boom turizmi, boom projektesh ndërtimore strategjike, boom vizitorësh e shërbimesh që kërkojnë menaxherë, mjeshtra, administratorë, teknikë e specialistë, IT, zhvillues e programues, krijues e inxhinierë, drejtues e zbatues, zanatçinj e artistë, punëtorë e ekspertë.

“Mbi 100 subjekte shqiptare lider të investimeve në shumë fusha, agjenci punësimi, së bashku me ente, dhoma biznesi, inovatorë, sipërmarrës, promotorë, korporata, agjenci e institucione shqiptare, mirëpresin me lajme të mira e kontrata pune në 2 mars”, u shpreh Gonxhja.

Për herë të parë qeveria shqiptare i dedikon diasporës edhe një website për informacion në kohë reale mbi ofertat e punësimit në sektorët privatë e publik, migrant.puna.gov.al ose punoneshqiperi.gov.al, ku ofrohet edhe informacion i vlefshëm për riintegrimin dhe programet mbështetëse mbi familjen, strehimin, formimin profesional, start-up apo fillimin e një biznesi si dhe aspektet sociale.

“Përmes kësaj nisme, duam të rikthejmë talentet por edhe mbarë familjet shqiptare që të investohen në atdhe, me dijet e eksperiencën e tyre të vyer, për një jetë e të ardhme shumë më të mirë për ta por edhe për vendin tonë, ndërsa punojmë për integrimin evropian dhe Shqipërinë 2030”, përfundoi Gonxhja.

Burimi ATSH