Kryeministri Edi Rama njoftoi për rritjen e sigurisë në shkolla do të aplikohet edhe vendosja e kontrollit digjital në të gjitha hyrjet dhe daljet nga shkolla për çdo lloj mjeti metalik ose telefon.

Gjatë konsultimit me një përfaqësi prindërish që drejtojnë Këshillat e Prindërve dhe anëtarë të këshillave në shkolla të ndryshme të Tiranës, Rama u shpreh se kontrolli digjital do të shërbejë për të evidentuar çdo lloj gjëje tjetër që fëmijët mund të kenë nëpër xhepa apo nëpër çanta.

Rama nënvizoi rëndësinë e zbatimit strikt të rregullit të vendosur të ndalimit të celularëve në shkollë, por që nuk mund të thuhet se zbatohet në mënyrë strikte.

Por Rama tha se problemi është më i gjerë sesa thjeshtë çfarë ndodh brenda mureve të shkollës.

“Ky problem është shumë përtej policisë, nuk është thjeshtë çështje policie dhe mbi të gjitha ky problem është jo vetëm brenda mureve të shtëpisë, që të gjithë ata që kanë fëmijë në një moshë para adoleshencës apo në adoleshencë e dinë shumë mirë se çfarë lloj beteje është me ato mrrokllat, as vetëm brenda mureve të shkollës, por edhe në hapësirën mes të dyjave, në të gjithë ndërveprimet e tjera mes të dyjave dhe s’dua të zgjatem më shumë që t’ju them që vetëm sikur për një moment të imagjinonim që atmosfera e mbingarkuar, me gjuhë të egër, me sjellje të egër, që përcillet përmes kanaleve mediatike të zbutej, të ishte një zbutje e përgjithshme. Por këtë s’është se e kemi shumë në dorë dhe nuk e di se çfarë ilaçi ka”, u shpreh kryeministri.

(ATSH)