Edhe pse në këtë dekadë të fundit qeveria ka bërë për kushtet dhe për nevojat e profesionistëve të shëndetësisë më shumë sa ç’është bërë në shumë dekada të mbledhura bashkë, fatkeqësisht nuk mund të thuhet dot se radhët e profesionistëve të shëndetësisë janë pastruar nga zullumqarët e shëndetit.

Kështu iu drejtua sot Kryeministri Edi Rama shefave të shërbimeve në Qendrën Spitalore Universitare “Nënë Tereza”, në takimin e thirrur për komunikimin e masave që do të merren pas ngjarjes tek Onkologjiku.

“Rrjeta e merimangave të Onkologjikut ishte edhe më zi sesa korrupsioni i marrjes së parave përkundër shërbimit. Ishte krim kundër të gjithë njerëzimit. Krim kundër njerëzores”, tha Rama.

Rama vlerësoi mjekët në kohën e pandemisë disa prej të cilëve vdiqën në krye të detyrës, duke u shpreh se pa ta, numri i shqiptarëve që ndërruan jetë në kthetrat e atij armiku të padukshëm do të kishte qenë ku e ku më i madh.

“Por edhe në atë kohë paniku për mbarë botën, mjaftoi ekspozimi i një Tixheje, ajo infermierja që u kërkonte lekë të afërme të pacientëve të ngujuar në Senatorium, e cila i kishte kthyer ata njerëz që luftonin në shtrat me vdekjen në pengje të një babëzie kriminale, për të prekur nervin më delikat të mbarë shoqërisë dhe për të ndezur një ndjenjë revoltë ndaj të gjithë komunitetit të mjekëve në atë kohë”, u shpreh Rama.

Kryeministri tha se nevojitet adresim sistemik i problematikave të ditura që janë adresuar dhe vazhdojnë të adresohen hap pas hapi. (ATSH)