Ambasada e SHBA-së në vendin tonë e cilëson si të papranueshëm sulmin e 24 shtatorit në Banjskë të Zveçanit.

I Ngarkuari me Punë i Ambasadës së SHBA-së, David Wisner takoi sot ministrin Për Evropën dhe Punët e Jashtme, Igli Hasani, ku e uroi për emërimin e ri dhe e falënderoi për partneritetin e fortë të Shqipërisë me Shtetet e Bashkuara.

Përmes një postimi në rrjetet sociale, Ambasada bën të ditur se ata diskutuan situatën në veri të Kosovës, duke rënë dakord se sulmi i 24 shtatorit ishte i papranueshëm dhe se personat e përfshirë në sulm duhet të sillen para drejtësisë.

“Wisner shprehu gjithashtu mirënjohjen e Shteteve të Bashkuara për bujarinë e Shqipërisë në pritjen e të evakuuarve afganë në pritje të rivendosjes. Ai falënderoi gjithashtu ministrin Hasani për mbështetjen e palëkundur të Shqipërisë ndaj Ukrainës në Këshillin e Sigurimit të OKB-së dhe kandidaturën e Shqipërisë për Komisionin e Kombeve të Bashkuara për të Drejtat e Njeriut”, shkruan Ambasada në “Facebook”.