Një surprizë e bukur e Javës Britanike mblodhi bashkë profesionistë të fushës dhe pasionantë pas arkitekturës.

“Peter Cook, një nga arkitektët më të mëdhenj britanikë dhe një personalitet i shquar i arkitekturës dhe artit bashkëkohor, na bëri pjesë të rrëfimit të tij profesional, në një rrugëtim nga projekti në projekt, në ndërhyrjet e guximshme që kanë shenjuar hapësirat publike jo vetëm në Mbretërinë e Bashkuar”, u shpreh ministrja e Kulturës, Elva Margariti e cila ishte e pranishme në takimin e zhvilluar në Teatrin Kombëtar të Operas e Baletit.

I pranishëm ka qenë edhe ambasadori i Mbretërisë së Bashkuar, Alastair King-Smith.

Sir Peter Cook nga CHAP Studios, Londër, është një nga figurat më të rëndësishme të arkitekturës për rreth gjysmë shekulli. Prania e tij në Tiranë solli një leksion frymëzues e të vyer për arkitektë, studentë e profesionistë të fushave të ndryshme.

Ndikimi i tij në arkitekturë, vjen prej morisë së projekteve të suksesshme dhe novatore në të gjithë globin, duke përmendur kësisoj Archigram, një grup eksperiementalist radikal me themelues Sir Peter Cook, që ka fituar çmime të ndryshme dhe ka ndikuar masivisht në arkitekturën botërore.