Ministri i Drejtësisë, Toni Gogu ka ndarë një mesazh mbi rëndësinë e dialogut dhe respektimit të institucioneve, duke iu referuar protestave të zhvilluara ditët e fundit në Tiranë.

Në një postim në rrjetet sociale, Gogu thekson se institucionet mund të kritikohen dhe t’u kërkohet llogari, por dhuna nuk është mënyra për të zgjidhur problemet.

“Institucionet nuk goditen, por sfidohen me argumente dhe dialog”, shprehet ministri, duke nënvizuar se pakënaqësitë duhet të kthehen në zgjidhje përmes komunikimit.

Në postimin e tij, Gogu ndan edhe mesazhin e Leopoldo-s, anëtar i World Jurist Association dhe pjesë e ekipit të World Law Foundation, i cili gjatë ditëve të fundit ka qenë në Tiranë dhe ka ndjekur nga afër protestat.

Ai shprehet se i kupton kërkesat e studentëve për akses në arsim dhe mundësi më të mira punësimi, por thekson se shteti i së drejtës duhet të respektohet në të dyja drejtimet.

“Kur kërkon diçka nga qeveria jote, duhet gjithashtu të marrësh në konsideratë që duhet ta bësh në mënyrën e duhur”, thuhet në mesazhin e tij.

Leopoldo nënvizon se institucionet publike, përfshirë Ministrinë e Drejtësisë, u përkasin qytetarëve dhe se dialogu duhet të jetë përgjigjja ndaj pakënaqësive dhe kërkesave për ndryshim.