Drejtori i përgjithshëm i Agjencisë së Mbikëqyrjes Policore, Ardi Veliu mikpriti përgjatë ditës së sotme në një takim pune një delegacion nga Drejtoria e Policisë së Malit të Zi, të shoqëruar nga përfaqësues të programit ICITAP të Ambasadës amerikane në Tiranë.

Takimi u zhvillua në kuadër të shkëmbimit të praktikave më të mira mbi përdorimin e sistemeve dhe databazës së të dhënave që shfrytëzohet aktualisht nga AMP për menaxhimin dhe trajtimin e ankesave të qytetarëve.

Përfaqësuesit e Policisë së Malit të Zi u njohën nga afër me punën dhe misionin e Agjencisë, si edhe me mënyrën se si funksionon procesi i marrjes e trajtimit të Ankesave nga Drejtoria e Inspektimit dhe Ankesave pranë AMP-së.

Agjencia e Mbikëqyrjes Policore do të vazhdojë të bashkëpunojë me agjencitë ligjzbatuese të rajonit, jo vetëm në kuadër të shkëmbimit të eksperiencave, por edhe në fusha të tjera me qëllim realizimin e misionit dhe vizionit të përcaktuar në ligj. /ATSH