Presidenti Bajram Begaj, nga Azerbajxhani ku po zhvillon një vizitë zyrtare, bëri thirrje që Kosova dhe Serbia të respektojnë marrëveshjet e dakordësuara në forumet ndërkombëtare.

Kreu i Shtetit, Begaj, gjatë konferencës së përbashkët për shtyp me Presidentin e Azerbajxhanit, Ilham Aliyev, fillimisht theksoi se Shqipëria mbështet paqen afatgjatë në rajonin e Kaukazit jugor.

“Me Presidentin Aliyev, u ndalëm dhe në çështje me rëndësi në politikën e jashtme. Ndoqa me vëmendje bisedimet e fundit në Uashington mes Azerbajxhanit dhe Armenisë. Shqipëria mbështet paqen afatgjatë në rajonin e Kaukazit jugor, të ndërmjetësuar nga partnerë të besueshëm. I shpreha Presidentit Aliyev se Shqipëria ka mbështetur gjithnjë integritetin territorial të Azerbajxhanit dhe zbatimin e rezoultave të Këshillit të Sigurimit”, – tha Begaj, i cili më tej ktheu vëmendjen tek tensionet në veriun e Kosovës.

“Edhe në rajonin e Balkanit Perëndim dialogu është shumë i rëndësishëm që ta shohim njëri-tjetrin, jo mes mërive të së djeshmes, por ta shohim njëri-tjetrin përmes mundësive të së ardhmes”, – theksoi Begaj.

“Shpreha bindjen se stabiliteti rajonal në Ballkanin Perëndimor është element i domosdoshëm. Kosova e Serbia janë palë negociuese për zgjidhjen e çdo mosmarrëveshjeje dhe të ndërtimit të një fryme të re bashkëpunimi mes njëri-tjetrit. Respektimi i marrëdhënieve të dakordësuara nga palët, si mes tyre dhe në forumet ndërkombëtare duhet të jetë pikë orientimi drejt paqes së qëndrueshme”, – nënvizoi Kreu i Shtetit.

“Prosperiteti dhe jo konflikti duhet të jetë busulla e orientimit të mbarëvajtjes së marrëdhënieve bilaterale dhe rajonale. Sa më shpesh të ndodhë diçka e tillë, aq më dobiprurëse do të jetë për popujt tanë”, – tha Begaj në fjalën e tij. /ATSH