Drejtuesi politik i Partisë Socialiste në Qarkun e Korçës, Niko Peleshi deklaroi sot se, Shqipëria nuk është më një vend në zhvillim, por një vend që në 10-vjeçarin e ardhshëm do të jetë pjesë e BE-së

I pranishëm në takimin e kryeministrit dhe njëherazi kryetarit të Partisë Socialiste, Edi Rama me gra dhe vajza në Korçë, Peleshi u shpreh në fjalën e tij, se kontributi i grave dhe vajzave, jo vetëm në shoqëri, por edhe në politikë dhe në qeverisjen e vendit është rritur vitet e fundit.

“Nuk është rastësi që në këto vite e kemi çuar rolin e gruas dhe vajzave në vendet e zhvilluara, madje i kemi kaluar. Ne jemi vendi i parë në botë me përqindjen më të madhe të grave në qeveri. 75 % e kabinetit qeveritar janë gra dhe vajza. Në Shqipëri infrastruktura dhe energjia drejtohen nga një grua, financat nga një grua, diplomacia nga një tjetër grua. Po ashtu arsimi, shëndetësia, sipërmarrja dhe inovacioni”, tha ai.

Duke folur për punë e qeverisë në këto 10 vite, Peleshi theksoi se, është bërë një punë e madhe dhe Shqipëria nuk është më një vend në zhvillim, por një vend që në 10-vjeçarin e ardhshëm, do të jetë pjesë e BE-së.

“Po mbyllim një dekadë punë. E kemi filluar nga minusi, nga gropa të mëdha financiare, nga rrugë pa rrugë, nga plagë të mëdha sociale, nga paga të ulëta dhe sot jemi ne që i shohim të gjithë në sy dhe u themi se erdhi dita e Shqipërisë. Erdhi dita të flasim, jo më për një Shqipëri në zhvillim, por ta vendosim yllin e ambicies shumë lart në mes të vendeve të zhvilluara. Në këtë 10-vjeçar që po troket Shqipëria nuk do të jetë më një vend me probleme dhe me kërkesa minimale, me nevoja bazike të pazgjidhura si uji, kanalizimet. Në këtë 10-vjeçar Shqipëria do të anëtarësohet në Bashkimin Evropian, do të jetë një vend evropian. Do të jetë një vend i krahasueshëm me vendet evropiane, për sa i përket pagës, të ardhurave dhe zhvillimit në përgjithësi. E në këtë faze të re ku po trokasim ne na duhen të gjithë. Na duhet i gjithë potenciali i shoqërisë. Nuk mund të shkojmë aty ku synojmë nëse nuk kemi me vete dhe në ballin e punës, gjysmën më vitale, më të bukur, më energjike, që janë gratë dhe vajzat”, tha Peleshi.