Kryetarja e Kuvendit, znj. Lindita Nikolla, uron fituesit e zgjedhjeve në Komunën e Tuzit, në Malin e Zi.

Koalicioni “Forumi Shqiptar – Bashkim dhe Zhvillim”, i drejtuar nga Nik Gjeloshaj, ka fituar shumicën absolute në zgjedhjet në Tuz – komunë e banuar me shumicë shqiptare në afërsi të Podgoricës – të cilat u mbajtën me 5 mars. Ky koalicion ka marrë rreth 52 për qind të votave, sipas të dhënave preliminare.

“Përgëzime koalicionit “Forumi shqiptar” dhe kryetarit të komunës së Tuzit, Nik Gjeloshaj, për fitoren në zgjedhjet e 5 marsit! Vullneti i zgjedhësve të Tuzit do t’i shërbejë zhvillimit, mirëqenies, bashkëjetesës paqësore të komuniteteve dhe të drejtave të shqiptarëve në vendin fqinj!”, shkruan znj.Nikolla.

Përgëzime koalicionit “Forumi shqiptar”dhe kryetarit të komunës së Tuzit, Nik Gjeloshaj, për fitoren në zgjedhjet e 5 marsit!Vullneti i zgjedhësve të Tuzit do t’i shërbejë zhvillimit,mirëqenies,bashkëjetesës paqësore të komuniteteve dhe të drejtave të shqiptarëve në vendin fqinj!

— Lindita Nikolla (@NikollaLindita) March 6, 2023

Në këtë koalicion, veç partisë së Gjeloshit – Alternativa Shqiptare (AA) – bëjnë pjesë edhe partitë tjera shqiptare: Aleanca Demokratike e Shqiptarëve (DSH), Unioni Kombëtar Shqiptar (UKSH) dhe Aleanca Demokratike e Malit të Zi (DSCG).

Koalicioni “Rrugës së drejtë” – Partia Demokratike e Socialistëve (DPS), Unioni Demokratik i Shqiptarëve (UDSH), Partia Boshnjake (BS) dhe Social Demokratët (SD), fitoi 33 për qind të votave.

Në garë ishin edhe dy koalicione të tjera, sikurse koalicioni shqiptar “Bashkë” – Partia Demokratike (PD) dhe Forca, dhe koalicioni “Me gjithë zemër për Tuzin” – Partia Socialdemokrate (SDP) dhe Lëvizja për Tuzin. Si dhe, tri subjekte politike: “Më të fortë jemi së bashku” – Demokratët, “Për Tuzin me nderë” – Partia Popullore Socialiste (SNP) dhe “Për gjeneratat e ardhshme” – Partia për Drejtësi dhe Pajtim (SPP).