Në Bruksel po zhvillohet sot mbledhja e grupit të punës për Zgjerimin dhe vendet që negociojnë anëtarësimin në Bashkimin Evropian (COELA), ku në fokus është pozicioni negociues i Shqipërisë për Kapitullin 20, “Sipërmarrja dhe Politika Industriale”.

Sipas dokumentacionit zyrtar të Këshillit të Bashkimit Evropian, Kapitulli 20 është pjesë e Cluster 3, “Konkurrueshmëria dhe rritja gjithëpërfshirëse”, ndërsa pozicioni negociues i Shqipërisë për këtë kapitull është në shqyrtim në kuadër të punës së COELA-s. Këshilli i BE-së e ka përfshirë çështjen në dokumentet e mbledhjeve të grupit të punës.

Diskutimet në COELA synojnë konsolidimin e qëndrimit të vendeve anëtare lidhur me mbylljen e përkohshme të Kapitullit 20 në negociatat e anëtarësimit me Shqipërinë.

Kapitulli 20 mbulon politikat e Bashkimit Evropian në fushën e sipërmarrjes dhe industrisë, përfshirë përmirësimin e klimës së biznesit, konkurrueshmërinë dhe mbështetjen për ndërmarrjet e vogla dhe të mesme.

Në raportin e fundit për Shqipërinë, Komisioni Evropian vlerëson se vendi ka një nivel përgatitjeje nga i moderuar në të mirë në fushën e politikave të sipërmarrjes dhe industrisë dhe evidenton progres, veçanërisht përmes rishikimit të Strategjisë së Zhvillimit të Biznesit dhe Investimeve.

Dokumentet e Këshillit tregojnë gjithashtu se Presidenca e Këshillit ka paraqitur një propozim kompromisi për draftin e Pozicionit të Përbashkët të BE-së për Kapitullin 20, në kuadër të negociatave të anëtarësimit me Shqipërinë.

Shqyrtimi në COELA është një hap në procesin e vendimmarrjes së vendeve anëtare përpara se çështja të kalojë në fazat e mëtejshme të procedurës së anëtarësimit.

Në mbledhjen e mëparshme të COELA-s nuk ishte arritur ende dakordësia e nevojshme për mbylljen e përkohshme të Kapitullit 20, ndërsa Këshilli i BE-së kishte bërë të ditur se çështja do të rikthehej në agjendë më 6 tetor.

Në rast të arritjes së konsensusit në COELA, procedura parashikon që çështja të kalojë për shqyrtim në COREPER, para formalizimit të mëtejshëm në një Konferencë Ndërqeveritare BE-Shqipëri.

Shqipëria ka hapur të gjitha kapitujt e negociatave për anëtarësim në BE. Deri tani, vendi ka mbyllur përkohësisht tre kapituj: Kapitullin 25, “Shkenca dhe kërkimi”, Kapitullin 26, “Arsimi dhe kultura”, dhe Kapitullin 30, “Marrëdhëniet e jashtme”.

Burimi ATSH