Pogradeci mirëpriti një delegacion të nivelit të lartë nga Italia, të kryesuar nga Ambasadori italian Marco Alberti, në kuadër të forcimit të bashkëpunimit dhe marrëdhënieve të mëtejshme mes dy palëve.

Delegacioni zhvilloi një takim me Kryetarin e Bashkisë Pogradec, Ilir Xhakolli, ku u diskutua për zgjerimin e bashkëpunimit, mbështetjen e projekteve të reja dhe mundësitë për zhvillimin e mëtejshëm të qytetit.

Një vëmendje e veçantë iu kushtua promovimit të Pogradecit në tregun italian, me synim rritjen e numrit të turistëve italianë dhe forcimin e shkëmbimeve turistike, kulturore dhe ekonomike.

Në vijim, delegacioni vizitoi Qendrën Multifunksionale Rinore dhe Teatrin e Kukullave të Pogradecit, të restauruara dhe pajisura me financim nga programi IADSA, duke parë nga afër rezultatet konkrete të bashkëpunimit të deritanishëm.

Delegacioni vizitoi gjithashtu Info Point-in Turistik të Pogradecit, të realizuar me financim italian në kuadër të projektit “Liqenet e Shqipërisë”, një hapësirë e rëndësishme për informimin e vizitorëve dhe promovimin e potencialeve turistike të Pogradecit dhe zonës përreth.

Gjatë takimit u diskutua edhe për mbështetjen e projekteve të tjera në Pogradec, ndërsa në kuadër të forcimit të lidhjeve mes Italisë dhe qytetit u trajtua edhe mundësia e hapjes së një konsullate në qytet.

Vizita u vlerësua si një tjetër hap konkret drejt thellimit të bashkëpunimit Pogradec–Itali dhe krijimit të mundësive të reja për zhvillimin, promovimin dhe ndërkombëtarizimin e qytetit.