Të ardhurat nga kontributet e sigurimeve shoqërore dhe shëndetësore arritën në 134,1 miliardë lekë në periudhën janar-gusht 2026, duke shënuar një rritje prej 15,9 miliardë lekësh, ose 13,4%, krahasuar me të njëjtën periudhë të vitit të kaluar.

Të dhënat paraprake fiskale zyrtare, përcjellë nga Agjencia për Media dhe Informim, tregojnë se plani i të ardhurave nga këto kontribute për tetëmujorin është realizuar në masën 100,4%.

Rritja e të ardhurave nga kontributet shoqërohet me zgjerim të aktivitetit të bizneseve. Gjatë janar-gushtit 2026, qarkullimi i bizneseve është rritur me 277 miliardë lekë në krahasim me të njëjtën periudhë të vitit 2025.

Sipas të dhënave fiskale, këta tregues lidhen me ecurinë më të mirë të tregut të punës, rritjen e deklarimit të pagave reale dhe përmirësimin e administrimit fiskal.

Performanca e tetë muajve të parë të vitit tregon një rritje të bazës së të ardhurave nga kontributet, në një kohë që aktiviteti ekonomik i bizneseve vijon të zgjerohet.