Ambasadoret dhe ambasadorët e „Miqve të Ballkanit Perëndimor“ u takuan dje me kryetarin e parlamentit Niko Peleshi dhe me kryetarët e grupeve dypalëshe të miqësisë në parlamentin shqiptar.

Në qendër të bisedës ishte procesi i anëtarësimit të Shqipërisë në BE, si dhe roli i rëndësishëm i parlamenteve dhe diplomacisë parlamentare në rrugën drejt integrimit evropian.

“Miqtë e Ballkanit Perëndimor” u ngrit në vitin 2023 me iniciativën e Austrisë. Krahas Austrisë, pjesë e grupit janë edhe Italia, Greqia, Kroacia, Sllovakia, Sllovenia, Çekia dhe Hungaria. Së bashku ata angazhohen që vendet e Ballkanit Perëndimor të bëjnë përpara në procesin e integrimit në BE.

“Austria e mbështet perspektivën evropiane të Ballkanit Perëndimore, pra edhe të Shqipërisë, në mënyrë konsekuente prej vitesh. Një pikë shumë e rëndësishme në këtë kontekst është integrimi gradual: ai mendohet të përshpejtojë procesin e anëtarësimit dhe t’u sjellë përparësi konkrete njerëzve të vendeve kandidate falë një lidhjeje më të ngushtë me BE-në që para anëtarësimit të plotë”, shkruan ambasada austriake në postimin e saj në rrjetet sociale.