Kryeministri i Kosovës, Albin Kurti ka pritur sot në takim kryetarin e Partisë Demokratike të Kosovës, Bedri Hamza për një bashkëbisedim që vjen një ditë pas shpalljes së aktgjykimit dënues të Dhomave të Specializuara ndaj Hashim Thaçit, Kadri Veselit, Rexhep Selimit dhe Jakup Krasniqit. Katërshja u UÇK-së u dënuan me dënim të përgjithshëm prej 81 vjetëve

Sipas njoftimit për këtë takim që ka ndarë Zyra e Kryeministrit, Kurti e ka vlerësuar aktgjykimin si të padrejtë, të rëndë dhe me pasoja të gjera.

Ai ka theksuar se vendimi i shkallës së parë duhet të ndryshojë në mënyrë pozitive gjatë procesit të apelit.

Kurti dhe Hamza kanë ndarë mendimet dhe përshtypjet e tyre për aktgjykimin. Ata kanë diskutuar edhe rrugët që duhet ndjekur për korrigjimin e vendimit.

Sipas njoftimit, të dy janë zotuar për komunikim të rregullt dhe të drejtpërdrejtë rreth çështjeve me interes publik, shtetëror dhe kombëtar.

“Rezistenca e popullit tonë dhe lufta çlirimtare, përveçse të drejta, ishin të domosdoshme në rrugën për liri dhe pavarësi. Ushtria Çlirimtare e Kosovës ishte përgjigje organizative e shqiptarëve ndaj një regjimi shtetëror shtypës sikurse ai i Jugosllavisë së Serbisë së Millosheviqit, që i ka të dokumentuara krimet: nga represioni sistematik deri te aparteidi, nga mohimi i të drejtave themelore njerëzore e qytetare deri te spastrimi etnik dhe gjenocidi”, thuhet në fund të njoftimit për takimin e Kurtit me Hamzën.

/Kosovapress/