Komisioneri Shtetëror i Zgjedhjeve ka vendosur t’i propozojë Komisionit të Ankimimeve dhe Sanksioneve (KAS) vendosjen e masave administrative ndaj 13 partive politike, pas shqyrtimit të raportit të auditimit për fondet e përfituara dhe të shpenzuara nga subjektet zgjedhore pjesëmarrëse në zgjedhjet për Kuvend të datës 11 maj 2025.

Në mbledhjen e sotme, KSHZ miratoi gjetjet e raportit të auditimit dhe propozoi masa me gjobë për subjektet politike që kanë shkelur dispozitat e Kodit Zgjedhor lidhur me raportimin financiar dhe financimin e fushatës zgjedhore.

Për mosdorëzim të raportit financiar brenda afatit ligjor, KSHZ propozoi gjobë prej 2 milionë lekësh për “Partinë Bashkimi Liberal Demokrat”, “Partinë Rruga e Vërtetë Shqiptare” dhe “Partinë Aleanca Arbnore Kombëtare”.

Ndërkohë, për dorëzim të raportit financiar jashtë afatit ligjor, u propozuan gjoba prej 500 mijë lekësh për “Partinë Aleanca Demokracia e Re”, “Partinë Aleanca Konservatore për Shqipërinë” dhe “Partinë Kristian Demokrate”.

Për shkelje të dispozitave që rregullojnë financimin e fushatës zgjedhore, KSHZ i ka propozuar KAS-it vendosjen e gjobave prej 100 mijë lekësh për “Partinë Balli Kombëtar”, “Partinë Djathtas 1912”, “Partinë Socialdemokrate”, “Partinë Nisma Thurje” dhe “Partinë Bashkimi për të Drejtat e Njeriut”.

Gjoba prej 500 mijë lekësh janë propozuar gjithashtu për “Partinë Lëvizja Atdheu” dhe “Partinë Aleanca Kombëtare Shqiptare” për mosdorëzim të raporteve financiare të kandidatëve.

Në të njëjtën seancë publike, Komisioneri Shtetëror i Zgjedhjeve miratoi edhe procedurën e verifikimit të nënshkrimeve për referendumet dhe nismat ligjvënëse të zgjedhësve në Republikën e Shqipërisë.

Sipas KSHZ-së, procedura e miratuar synon krijimin e një procesi të qartë, të unifikuar dhe transparent për administrimin dhe verifikimin e nënshkrimeve të paraqitura në mbështetje të nismave qytetare, duke garantuar respektimin e parimeve të ligjshmërisë, paanshmërisë, proporcionalitetit, mbrojtjes së të dhënave personale dhe procesit të rregullt administrativ.

Gjithashtu, gjatë mbledhjes së sotme u plotësua edhe vakanca në Këshillin e Bashkisë Peqin, me kandidatin nga lista shumemërore e Partisë Socialiste të Shqipërisë, Astrit Fadil Kaziu.

Marrë nga ATSH