Ministrja e Ekonomisë dhe Inovacionit, Delina Ibrahimaj deklaroi sot, pas mbledhjes së Këshillit të Ministrave, se është miratuar zgjerimi i garancisë sovrane për mbështetjen e bizneseve, në kuadër të programit “Dyfisho Sipërmarrjen Tënde”.

Sipas saj, ky program do të jetë i aksesueshëm nga të gjitha bizneset në Shqipëri përmes sistemit bankar, duke nisur nga ky muaj, ndërsa norma e interesit e aplikuar përmes garancisë sovrane do të jetë mesatarisht rreth 2%.

“Ky është një instrument financiar jashtëzakonisht i rëndësishëm në këtë fazë të zhvillimit të ekonomisë shqiptare, pasi bizneset kanë nevojë për më shumë mbështetje dhe akses në financim për të rritur investimet, produktivitetin dhe konkurrueshmërinë”, u shpreh Ibrahimaj.

Ajo theksoi se masa synon të lehtësojë aksesin në kredi dhe të forcojë kapacitetet e sipërmarrjeve shqiptare për t’u përafruar me standardet e Bashkimit Evropian.

Në të njëjtën mbledhje, sipas ministres, janë miratuar edhe tre projektligje që lidhen me Kapitullin 7 të negociatave me BE-në, për Pronësinë Industriale, përkatësisht projektligji për dizenjot, për treguesit gjeografikë dhe për të drejtat e autorit.

Ibrahimaj u shpreh se këto nisma ligjore përbëjnë hapa të rëndësishëm drejt përmbylljes së Kapitullit 7 brenda afateve të parashikuara në procesin e integrimit europian.

Burimi ATSH