Delegacioni i përhershëm i Kuvendit pranë Asamblesë Parlamentare të Këshillit të Evropës po merr pjesë në sesionin e verës të kësaj asambleje, i cili mbahet në Strasburg më 22-26 qershor 2026.

Kuvendi njofton se gjatë këtij sesioni do të diskutohen disa çështje të rëndësishme politike dhe të të drejtave të njeriut si: mbrojtja e demokracisë nga ndikimet dhe sfidat që sjell inteligjenca artificiale; demokracia, të drejtat e njeriut dhe sundimi i ligjit në Iran; funksionimi i institucioneve demokratike në Gjeorgji dhe Serbi; eliminimi i stereotipeve gjinore etj.

Delegacioni i Kuvendit i përbërë nga Olta Xhaçka, kryetare e delegacionit dhe anëtaret Ogerta Manastirliu, Albana Vokshi dhe Iris Luarasi është përfshirë në punën sesionit duke marrë pjesë aktive në sesionin plenar dhe në mbledhjet e komiteteve të Asamblesë.

Ditën e djeshme, asambleja diskutoi raportin e bashkëraportuesve Victoria Tiblom dhe Yonuz Emre, mbi “Funksionimin e institucioneve demokratike në Serbi”.

Në fjalën e saj, kryetarja e delegacionit të Shqipërisë vlerësoi punën e bashkëraportuesve për Serbinë, por theksoi se disa çështje të rëndësishme si mbrojtja e të drejtave të komunitetit shqiptar në Luginën e Preshevës, sigurimi i llogaridhënies së plotë për sulmin në Banjskë të vitit 2023 dhe kundërshtimi i vazhdueshëm i Serbisë ndaj anëtarësimit të Kosovës në Këshillin e Evropës kërkojnë më shumë vëmendje.

Xhaçka nënvizoi se trajtimi i këtyre çështjeve është thelbësor për forcimin e të drejtave të njeriut, standardeve demokratike, sundimit të ligjit, besimit dhe stabilitetit afatgjatë në rajon.

“Në të njëjtën kohë, këto çështje nuk duhen konsideruar si çështje dypalëshe por si çështje që lidhen drejtpërdrejt me parimet, detyrimet dhe angazhimet e përbashkëta të shteteve anëtare të Këshillit të Evropës”, përfundoi Xhaçka.

Burimi ATSH