Aeroporti Ndërkombëtar i Tiranës po përjeton një nga periudhat më intensive të vitit, teksa fluksi i pasagjerëve vijon të rritet me ritmet e sezonit turistik veror.

Dogana e Rinasit bëri të ditur sot se vetëm gjatë 24 orëve të fundit janë regjistruar rreth 53 mijë pasagjerë në hyrje dhe dalje të vendit, një tregues i rritjes së lëvizjeve ajrore dhe i interesit në rritje për Shqipërinë si destinacion turistik.

Sipas njoftimit zyrtar, strukturat doganore në aeroport vijojnë të jenë të angazhuara në përpunimin e fluksit të lartë të udhëtarëve, duke garantuar kontrolle të shpejta dhe efikase, si dhe respektimin e standardeve të sigurisë dhe të shërbimit ndaj qytetarëve.

“Fluksi i pasagjerëve në Aeroportin Ndërkombëtar të Tiranës vijon të rritet me ritmet e sezonit veror. Vetëm gjatë 24 orëve të fundit janë regjistruar rreth 53 mijë pasagjerë, ndërsa strukturat doganore vijojnë punën për garantimin e përpunimit efikas dhe shërbimit në standarde të larta”, thuhet në njoftimin e Doganës së Rinasit.

Institucionet e linjës kanë marrë masa organizative shtesë për menaxhimin e numrit në rritje të pasagjerëve, veçanërisht gjatë orareve me intensitet më të lartë fluturimesh.

Rritja e qarkullimit në aeroport vjen në një periudhë kur Shqipëria po regjistron një sezon të suksesshëm turistik, me shtim të numrit të vizitorëve të huaj dhe të udhëtimeve të shtetasve shqiptarë drejt destinacioneve ndërkombëtare. Aeroporti Ndërkombëtar i Tiranës mbetet pika kryesore hyrëse e turistëve që vizitojnë vendin, duke shënuar nga viti në vit volume gjithnjë e më të larta pasagjerësh.

Burimi ATSH