Ministrja e Shtetit dhe Kryenegociatorja e Shqipërisë në procesin e integrimit në Bashkimin Europian, Majlinda Dhuka bëri të ditur sot se “Shqipëria ka përfunduar përgatitjet teknike edhe për pesë kapituj të tjerë për vitin 2026″.

Në një seancë dëgjimore në Komisionin për Evropën dhe Punët e Jashtme, Dhuka u shpreh se vendi po ecën sipas udhërrëfyesit të hartuar nga BE i cili parashikon mbylljen e 6 kapitujve të tjerë brenda vitit 2026.

“Kemi përfunduar përgatitjet teknike edhe për pesë kapituj të tjerë për vitin 2026, përveç 4 kapitujve që kemi mbyllur. Kapitulli 6, ‘Ligji i shoqërive tregtare’, kapitulli 7, ‘E drejta e pronësisë intelektuale’, kapitulli 21, ‘Rrjetet transeuropiane’, kapitulli 13, ‘Peshkimi’, dhe kapitulli 17, ‘Politika ekonomike dhe monetare’”, bëri të ditur Dhuka.

Sipas saj, puna ka përfunduar nga pikëpamja teknike dhe në javët që vijnë pritet vlerësimi i Komisionit Europian dhe fillimi i diskutimeve në COELA dhe COREPER.

“Është në proces edhe kapitulli 3, ‘Lëvizja e lirë e shërbimeve’. Jemi në proces diskutimesh. Nesër do të kemi një tjetër takim vlerësues”, tha Dhuka.

Duke iu referuar raportit të Komisionit Europian, Dhuka u ndal te vlerësimi për rezultatet e institucioneve të drejtësisë në luftën kundër krimit dhe korrupsionit.

“Raporti njeh konsolidimin e rezultateve të punës nga SPAK, Prokuroria e Përgjithshme, Gjykata e Posaçme. Shqipëria është e qëndrueshme në rrugën e saj të Reformës në Drejtësi dhe në rezultatet në luftën kundër krimit, korrupsionit, përfshirë atë të nivelit të lartë. Në këtë kuptim, diskutimi ka gjithmonë edhe anën e mundësive dhe të progresit, edhe anën e detyrave që kemi përpara”, tha Dhuka, duke theksuar se Shqipëria është në kilometrin e fundit të negociatave për anëtarësim.

Burimi ATSH