Qendra Kombëtare e Biznesit (QKB) dhe InfoCamere kanë dakordësuar hapat për thellimin e bashkëpunimit në funksion të modernizimit të Regjistrit Tregtar Shqiptar dhe avancimit të shërbimeve digjitale për biznesin.

Në kuadër të një vizite zyrtare pune të zhvilluar në Padova, delegacioni shqiptar i kryesuar nga drejtori i përgjithshëm i QKB-së, Etugert Llazi, zhvilloi takime me drejtues dhe ekspertë të InfoCamere, institucioni që administron sistemin italian të regjistrit tregtar dhe shërbimeve elektronike për biznesin.

Gjatë workshop-it të përbashkët, palët diskutuan implementimin e një sistemi modern regjistrimi dhe raportimi të bazuar në standardin ndërkombëtar XBRL, integrimin me sistemet ekzistuese dhe procesin e migrimit të të dhënave drejt platformës së re digjitale.

Bashkëpunimi synon rritjen e efikasitetit të shërbimeve ndaj biznesit, garantimin e transparencës dhe harmonizimin e mëtejshëm të sistemit shqiptar me standardet europiane të digjitalizimit.

Një rëndësi e veçantë iu kushtua përputhshmërisë së sistemit të ri me direktivat e Bashkimit Evropian, mbrojtjes së të dhënave personale dhe ndërlidhjes me sistemin BRIS, që mundëson ndërveprimin me regjistrat europianë të biznesit.

Delegacioni shqiptar u njoh gjithashtu me modelin italian të regjistrit plotësisht digjital, përdorimin e identifikimit elektronik dhe nënshkrimit elektronik, si dhe standardet e sigurisë kibernetike dhe administrimit të infrastrukturës teknologjike.

Në kuadër të vizitës, përfaqësuesit e QKB-së zhvilluan edhe një vizitë në Data Center-in e InfoCamere, ku u prezantuan kapacitetet teknologjike dhe organizimi operacional për garantimin e vazhdimësisë së shërbimeve.

Takimet u zhvilluan në tre sesione të dedikuara për aspektet ligjore dhe rregullatore, aspektet teknike dhe IT, si dhe ndikimin ekonomik të reformimit të regjistrit tregtar.

Palët diskutuan gjithashtu modelin e qeverisjes së projektit, institucionet pjesëmarrëse dhe fazat e implementimit të sistemit të ri, i cili pritet të kontribuojë në përmirësimin e klimës së biznesit dhe rritjen e standardeve të transparencës dhe eficiencës në Shqipëri.

Burimi ATSH