Ministri i Turizmit, Kulturës dhe Sportit, Blendi Gonxhja deklaroi sot se po ndërmerren hapat e duhur për të garantuar jo vetëm një sezon veror më të pastër.

Duke iu përgjigjur interesit të gazetarëve në daljen pas mbledhjes së qeverisë lidhur me menaxhimin e mbetjeve dhe furnizimin me ujë, Gonxhja tha se ka pasur një riorganizim në nivel institucional dhe ka një ndarje të portofoleve. “Ministria e Mjedisit ka përsipër edhe gjithë problematikën sa i takon trajtimit të mbetjeve dhe pastrimit të vendit”, sqaroi ai.

“Ne jemi pjesë aktive e grupeve dhe taskforcës apo njësive që do të krijohen në nivel rajonal apo vendi nga Ministria e Mjedisit, e cila po ndërmerr hapat e duhur për të garantuar një sezon edhe më të pastër të sezonit veror, por edhe për gjithë vitin”, tha Gonxhja.

Ministri Gonxhja bëri të ditur se Agjencia Kombëtare e Bregdetit ka edhe një kontratë shtesë në ndihmë të bashkive Lezhë dhe Pogradecit, ku do të ketë një nivel edhe më të mirë pastrimi në disa prej pikave problematike në këto bashki.

Në përgjithësi, vijoi Gonxhja, në bashkitë bregdetare, por edhe në ato me liqene siç është rasti i Pogradecit do të kemi një sezon, por edhe një vit shumë më të pasur nga pikëpamja e mbulimit të shërbimit të pastrimit, por edhe trajtimit të mbetjeve.

Lidhur me furnizimin me ujë, Gonxhja tha se “ky është një problem që lidhet me bashkitë, por edhe me Agjencinë Kombëtare të Kanalizimit të Ujërave që është në varësi të Ministrisë së Infrastrukturës dhe Energjisë”.

“Jemi në kontakt të vazhdueshëm sa i takon problematikave, kemi bërë takime të ndryshme me turoperatorë, menaxherë hotelesh, shoqatat hoteliere etj, ku kemi dëgjuar problematikat e tyre. Po mundohemi që të kemi një sezon sa më të mirë, situata është mjaft e mirë edhe pas ndërhyrjeve në infrastrukturat kryesore të kanalizimeve dhe kolektorëve në disa prej bashkive”, tha Gonxhja.

Burimi ATSH