Ministri i Turizmit, Kulturës dhe Sportit, Blendi Gonxhja zhvilloi një takim me operatorët turistikë në Sarandë, në fokus të të cilit ishte turizmi gjithëvjetor, cilësor dhe i qëndrueshëm.

Gjatë takimit, Gonxhja tha se “Saranda dhe gjithë Shqipëria kanë potencial të jashtëzakonshëm për të ofruar eksperienca unike në çdo stinë, jo vetëm në muajt e verës”.

Ministri Gonxhja u shpreh se “po punojmë për më shumë standarde, më shumë mikpritje, më shumë bashkëpunim mes qyteteve dhe destinacioneve tona, që vizitorët të rikthehen sërish dhe të bëhen ambasadorët më të mirë të vendit tonë”.

“Synimi ynë është i qartë: jo vetëm turizëm me numra, por turizëm me vlerë, që sjell zhvillim për komunitetet dhe ekonomi për familjet shqiptare. Paralelisht, investimet në ekonominë blu, marina, lundrim, infrastrukturë dhe mjedis do ta bëjnë bregdetin tonë edhe më konkurrues”, theksoi Gonxhja.

Qyteti bregdetar i Sarandës ofron pafund eksperienca të mrekullueshme për çdo turist. E ndodhur në skajin më jugor të Shqipërisë, në gjirin me të njëjtin emër të detit Jon, Saranda me vendet e shumta unike, peizazhet dhe plazhet piktoreske tërheq mijëra vizitorë në çdo stinë.

Burimi ATSH