Ministrja e Shtetit për Administratën Publike dhe Antikorrupsionin, Adea Pirdeni, u shpreh se Shqipëria vijon të jetë në pararojë të procesit të integrimit në Bashkimi Evropian, duke avancuar me hapjen dhe zhvillimin e negociatave.

Gjatë një takimi me studentë në Tiranë, për të diskutuar mbi procesin e negociatave ku mori pjesë edhe Kryeministri Edi Rama, Pirdeni theksoi se pas ecurisë pozitive të këtij procesi qëndron puna e përditshme e administratës publike dhe e një numri të madh profesionistësh të angazhuar.

Ajo vlerësoi rolin e të rinjve në këtë proces, duke nënvizuar se shumë prej tyre, të dalë jo shumë vite më parë nga auditoret universitare, janë sot pjesë e administratës dhe mbajnë një peshë të rëndësishme në negociatat për anëtarësim.

“Procesi i integrimit është kompleks dhe sfidues, por njëkohësisht shumë domethënës për të ardhmen e vendit, ndërsa të rinjtë përbëjnë një forcë kyçe në përparimin e tij”, tha ajo.

Pirdeni u bëri thirrje të rinjve që të aplikojnë dhe të bëhen pjesë e Programit të Ekselencës, duke theksuar se mbi 860 punonjës të administratës publike kanë ardhur nga ky program dhe kontribuojnë çdo ditë me profesionalizëm dhe përkushtim për realizimin e objektivit strategjik të Shqipërisë për anëtarësim në BE brenda vitit 2030.

Burimi ATSH