Në ambientet e Europe House u zhvillua sot ceremonia e lansimit të projektit “Weaving Digital Safety – Albania’s Women in Media Network Initiative (WISA)”, nismë që synon fuqizimin e grave në media dhe rritjen e sigurisë digjitale në këtë sektor.

Projekti WISA vjen si një përgjigje konkrete ndaj sfidave dhe nevojave të vetë grave që punojnë në media, duke u ndërtuar mbi përvojat dhe zërat e tyre për më shumë mbrojtje, mbështetje dhe solidaritet profesional.

Nisma zbatohet nga Albanian Women in Audiovisual (AWA), në partneritet me SCiDEV dhe AGSH, me mbështetjen financiare të Bashkimi Europian.

Sipas organizatorëve, projekti do të shtrihet në një periudhë 30-mujore dhe synon zgjerimin dhe konsolidimin e Rrjetit të Grave në Media në Shqipëri. Në përfundim të tij, ky rrjet pritet të funksionojë si një organizatë e pavarur, me përfaqësim të gjerë dhe zë institucional në nivel kombëtar.

Gjatë aktivitetit të sotëm u theksua rëndësia e krijimit të një mjedisi më të sigurt digjital për gazetaret dhe profesionistet e medias, si dhe nevoja për bashkëpunim më të ngushtë mes aktorëve të shoqërisë civile, institucioneve dhe partnerëve ndërkombëtarë.

Projekti WISA synon të kontribuojë në forcimin e kapaciteteve profesionale, rritjen e ndërgjegjësimit për sigurinë online dhe krijimin e mekanizmave mbështetës për gratë në media, duke hapur një kapitull të ri për këtë komunitet në Shqipëri.

Burimi ATSH