Në mbledhjen e grupit parlamentar të Partisë Socialiste, u prezantua sot raporti i pesë anëtareve të PS-së në Këshillin e Mandateve në lidhje me kërkesën e Prokurorisë së Posaçme, për heqjen e imunitetit të deputetes Belinda Balluku.

Në fjalën e tij, kryeministri Edi Rama, njëherësh, kryetar i Partisë Socialiste, vlerësoi Ballukun për aktivizimin e saj në terren si drejtuese politike e qarkut të Fierit.

Megjithatë Rama shtoi se nuk do të marrë në mbrojtje asnjë zyrtar i cili përballet me drejtësinë.

“Pak kush nga ne këtu i mban si Belinda Balluku kontaktet me territorin duke shkuar rregullisht në zonat që mbulon si drejtuese politike. Nuk kam në plan ta shpall as hero dhe as viktimë, Belindën sot dhe uroj që në hetimin e çështjes për të cilën ajo akuzohet se ka kryer në vepër penale, prokuroria të shterojë çdo pistë që mund të çojë te korrupsioni. Sepse në fund të ditës gjithkush pas të tetëmbëdhjetave varet nga këmbët e veta me ligj dhe me zakone. Unë si kryeministër nuk e kam as të mundur, por as të lejuar qoftë nga ligji, qoftë nga zakoni që t’i mbaj pishën asnjë bashkëpunëtori,” tha Rama.

Rama shtoi se “nuk kam ndërmend as t’ju them që Belinda Balluku është një njeri që durohet lehtë në punë, pasi ca më shume e ca më pak e dimë të gjithë sesa e lehtë është të merresh me të kur i thotë koka që ka të drejtë dhe do me çdo kusht që të dalë e vetja”.

“Nuk kam, jo e jo ndërmend, ta shpall të pafajshme për çfarë akuzohet apo të shkel për të vijën e kuqe të cilën e kam vizatuar para deputetëve në këtë sallë, të nesërmen e miratimit të Reformës në Drejtësi dhe vlen për të gjithë njësoj, duke e marrë në mbrojtje nga drejtësia dhe duke hyrë në përmbajtjen e çështjes gjëra që takojnë avokatit, prokurorit, gjykatësit, jam apo nuk jam unë dakord me këta të fundit”, tha Rama.

Marrë nga ATSH