Forcimi i bashkëpunimit ndërkombëtar dhe shkëmbimi i praktikave më të mira në fushën e menaxhimit aeroportual ishin në fokus të një vizite zyrtare të delegacionit nga Milan Bergamo Airport, në Rinas, në kuadër të një programi të strukturuar shkëmbimi mes dy aeroporteve.

Gjatë dy ditëve të takimeve u zhvilluan diskutime të detajuara mbi aspektet operacionale, menaxheriale dhe strategjike të administrimit të aeroporteve, duke përfshirë ndarjen e praktikave më të mira, modeleve organizative dhe qasjeve ndaj zhvillimit të qëndrueshëm.

Palët shkëmbyen eksperienca konkrete mbi menaxhimin e fluksit të pasagjerëve, optimizimin e proceseve operacionale dhe përmirësimin e standardeve të shërbimit.

Sipas TIA-s, lidhjet e konsoliduara ajrore ndërmjet Tiranës dhe Bergamos përbëjnë një element të rëndësishëm në forcimin e marrëdhënieve ndërinstitucionale, si dhe në lehtësimin e lëvizjes dhe bashkëpunimit mes komuniteteve dhe aktorëve ekonomikë të dy vendeve.

Përfaqësuesit e Tirana International Airport e vlerësuan këtë vizitë si një hap të rëndësishëm në avancimin e partneriteteve evropiane dhe në përmirësimin e vazhdueshëm të standardeve operacionale dhe organizative, në përputhje me praktikat më të mira ndërkombëtare në fushën e aviacionit civil.

Burimi ATSH