Ministri i Mbrojtjes, Pirro Vengu në konferencën për shtyp u ndal edhe tek një paketë e re masash për forcimin e kapaciteteve të vendit në përballimin e emergjencave civile, duke vënë theksin te fuqizimi i flotës tokësore dhe ajrore.

Vengu tha se po punohet për prodhimin e mjeteve të reja për emergjencat civile, të cilat do t’u shpërndahen bashkive me nevojat më të mëdha në vend.

Sipas ministrit, në proces janë edhe negociatat për blerjen e dy avionëve zjarrfikës, ku synohet që të paktën një prej tyre të jetë operacional brenda këtij viti.

“Lidhur me fuqizimin e flotës tokësore, kemi një kontratë për prodhimin e mjeteve të emergjencave civile. Kjo do të na japë mundësinë që Emergjencat Civile t’i transferojë këto mjetë bashkive që kanë më shumë nevojë. Në këtë mënyrë ne fillojmë rinovimin e flotës kombëtare”, tha Vengu.

Ministri Vengu informoi se është në finalizim e sipër negociata për blerjen e dy avionëve zjarrfikës.

“Ka marrë kohën e duhur, po prodhohen për ne dhe nuk janë të gatshëm në treg. Një element i negociatës është që të paktën një prej këtyre mjeteve të vijë sa më parë nuk e di a do vijë në kohë për sezonin po synojmë ta kemi një mjet këtë vit”, tha Vengu.

Duke u ndalur tek gatishmëria e mjeteve ekzistuese, Vengu tha se “Forcat Ajrore dhe Shtabi i Përgjithshëm janë të angazhuar të kemi një flotë sa më të plotë sivjet. Të kemi minimalisht në çdo element katër helikopterë në dispozicion për çdo emergjencë”.

Burimi ATSH