Gjuha shqipe u përfaqësua me krenari sot, krahas më shumë se 20 gjuhëve të tjera evropiane, në edicionin e 26-të të Ditës Evropiane të Gjuhëve në Beograd.

Në këtë vit të dytë radhazi që gjuha shqipe prezantohet në këtë aktivitet prestigjioz, Ambasada e Republikës së Shqipërisë në Republikën e Serbisë synoi të promovonte shkëmbimin kulturor rajonal dhe të theksonte diversitetin e pasur gjuhësor evropian, përmes kuiceve interaktive, librave dhe suvenireve nga Shqipëria.

“Ky aktivitet vjetor, i cili u zhvillua sot nga ora 10:00 deri në 13:00 në gjashtë lokacione të ndryshme të kryeqytetit, u organizua nga rrjeti EUNIC Srbija , Delegacioni i Bashkimit Evropian në Serbi dhe Këshilli i Evropës. Aktiviteti mblodhi së bashku me sukses qindra nxënës dhe të rinj të moshës 12–18 vjeç, të shoqëruar nga mësuesit e tyre, ndërsa në të u përfaqësuan 27 vende dhe organizata”, shkruan ambasada shqiptare në Serbi.