Ambasadori i Republikës së Shqipërisë në Austri, Fate Velaj, zhvilloi një takim me Christine Schwarz-Fuchs, Presidente e Bundesratit të Republikës së Austrisë.

Gjatë takimit biseduan për zhvillimet aktuale në Shqipëri dhe rrugën drejt integrimit të plotë në Bashkimin Evropian, si edhe për punën e Ambasadës së Shqipërisë në Vjenë si një urë diplomatike dhe kulturore mes Shqipërisë, Austrisë dhe trupit diplomatik në Vjenë.

Në fokus ishin gjithashtu mundësitë për forcimin e marrëdhënieve dhe krijimin e partneriteteve të reja ndërmjet Bundesratit austriak dhe Parlamentit të Shqipërisë, veçanërisht përmes kontakteve institucionale, rajonale dhe kulturore.