Punimet për rikonstruksionin e shkollës 9-vjeçare “Pano Nikolla Meniko” në Himarë janë drejt përfundimit, duke ofruar ambiente tërësisht të rikonstruktuara, bashkëkohore për zhvillimin e procesit mësimor.

Ministrja e Arsimit Mirela Kumbaro dhe kryetari i bashkisë Himarë, Vangjel Tavo, kanë parë nga afër ecurinë e punimeve për rikonstruksionin e plotë të shkollës.

Gjatë vizitës, ministrja Kumbaro theksoi rëndësinë e bashkëpunimit me pushtetin vendor për përmirësimin e infrastrukturës arsimore në të gjithë vendin.

“Pamë nga afër ecurinë e punimeve për rikonstruksionin e plotë të shkollës 9-vjeçare “Pano Nikolla Meniko”, e cila po bëhet gati të hapë dyert për nxënësit dhe mësuesit në këtë vit të ri shkollor. Shkolla e rikonstruktuar do t’u ofrojë 115 nxënësve dhe mësuesve ambiente bashkëkohore dhe moderne, për një proces mësimor më cilësor. Bashkë me pushtetin vendor, po bëhemi gati për vitin e ri shkollor duke realizuar ndërhyrjet e domosdoshme në shkolla, nga veriu në jug, për t’u siguruar nxënësve tanë kushte sa më të mira dhe optimale për të mësuar. Teksa 42 terrene sportive dhe shkolla të reja, me klasa, biblioteka, laboratorë, ambiente për aktivitete do të hapin dyert në këtë vit të ri shkollor për mbarëvajten e procesit mësimore dhe programit ‘Pas Shkolle’ me kushte dinjitoze për çdo nxënës”, tha Kumbaro.

Pas përfundimit të investimit, rreth 115 nxënës dhe mësues do të kenë në dispozicion kushte më të mira për zhvillimin e mësimit, ndërsa investimi në shkollë dhe kopsht do t’u shërbejë në total më shumë se 150 fëmijëve, nxënësve, mësuesve dhe edukatorëve të qytetit të Himarës.

Marrë nga ATSH