Ministri i Punëve të Brendshme, Besfort Lamallari, reagoi sot pasi një mjet lundrues shkeli perimetrin e sigurisë dhe cenoi jetën e pushuesve në plazhin e Shëngjinit.

Lamallari theksoi se plazhet duhet të jenë ambiente të sigurta për familjet dhe turistët, ndërsa personat që me veprimet e tyre rrezikojnë jetën e të tjerëve do të përballen me ligjin.

“Plazhet tona janë për familjet dhe pushuesit, jo për aventurierët që luajnë me jetën e të tjerëve si ky këtu në Shëngjin. Kush sfidon ligjin dhe vë në rrezik shëndetin dhe jetën e turistëve për aventurat e tij, do të përballet me pasojat pa asnjë tolerancë dhe vonesë. Nuk do të ketë as paralajmërime, as justifikime”, theksoi ai.

Lamallari falënderoi qytetarët për denoncimet dhe mediat për publikimin e rasteve të tilla, duke theksuar se bashkëpunimi i tyre është i rëndësishëm për garantimin e sigurisë në zonat turistike.

“Falënderoj qytetarët për besimin dhe raportimin e rasteve të tilla si dhe mediat për ekspozimin e tyre. Siguria e pushuesve nuk negociohet!”, shkruan ministri.

Burimi ATSH