Avokati i Popullit, Endrit Shabani, u angazhua të koordinojë punën për zgjidhjen e disa prej problemeve më të mprehta të lëvizshmërisë së personave me aftësi të kufizuara, duke nisur nga transporti dhe parkimi. Angazhimi u mor në takimin me rrjetin e organizatave të personave me aftësi të kufizuara (OPAK), zhvilluar në ambientet e Caritas Shqiptar.

“Aksesueshmëria nuk është favor që u bëhet personave me aftësi të kufizuara. Është detyrim për të ndrequr një padrejtësi, pasi godinat dhe mjetet e transportit publik, shpesh nuk janë projektuar për t’u shërbyer nevojave të të gjithëve”, u shpreh Shabani.

Avokati i Popullit do të kërkojë që flotat e taksive të përfshijnë detyrimisht automjete të përshtatshme për personat që lëvizin me karrocë, si dhe dixhitalizimin e kartës së parkimit, në mënyrë që barra e provës të kalojë te shteti dhe jo te qytetari, i cili sot detyrohet të kalojë një kalvar burokratik për tu pajisur me kartën e veçantë të parkimit në zonat e dedikuara.

Sipas Shabanit, personat me aftësi të kufizuara përballen çdo ditë me pengesa që nisin te transporti publik: stacionet nuk kanë infrastrukturën e nevojshme dhe hipja në autobus është pothuajse e pamundur për ata që lëvizin me karrocë. Gjetja e një taksie të përshtatshme, si në Tiranë ashtu edhe në rrethe, mbetet mision i vështirë, ndërsa hapësirat e pakta të parkimit të dedikuara për ta bllokohen nga automjete të tjera.

“Garantimi i aksesueshmërisë nuk është vetëm detyrim kushtetues dhe ligjor i brendshëm, por edhe detyrim që buron nga procesi i integrimit evropian: përafrimi me standardet e BE-së kërkon transport, shërbime dhe hapësira publike të aksesueshme për të gjithë, dhe ecuria në këtë fushë matet si pjesë e vlerësimit të Shqipërisë në rrugën drejt anëtarësimit”, tha Shabani.

“Organizatat rikthyen gjithashtu në vëmendje nevojën urgjente për miratimin e minimumit jetik, kërkesë që Avokati i Popullit e ka artikuluar në mënyrë të përsëritur, duke i cilësuar pagesat aktuale mujore si tejet të ulëta për një jetesë dinjitoze”, vijoi ai, ndërsa Avokati i Popullit do të ndjekë këto çështje me organet publike përgjegjëse dhe do të informojë publikisht mbi ecurinë e tyre.

Burimi ATSH