Ministrja e Arsimit, Mirela Kumbaro deklaroi sot se nga ky shtator, viti i ri shkollor nis me kurrikula të përditësuara për klasat I, VI dhe X.

Kumbaro e cilësoi këtë si një një hap të rëndësishëm në transformimin e arsimit parauniversitar dhe në përgatitjen e nxënësve për sfidat e një bote që ndryshon me ritme të shpejta, teksa ky proces shoqërohet me mësues të trajnuar dhe të mbështetur profesionalisht, falë punës së përbashkët të Agjencisë së Sigurimit të Cilësisë në Arsimin Parauniversitar me 9 universitetet partnere.

Në seminarin “Përditësimet në kurrikulë dhe sfidat e zbatimit”, organizuar nga ASCAP, Kumbaro tha se u ndanë përvoja dhe praktika të mira me partnerët e nëntë universiteteve, me të cilët janë trajnuar mbi 12 mijë mësues në fazën e parë të Programit Kombëtar të Zhvillimit Profesional të Mësuesve 2026–2028.

“Kurrikulat e reja sjellin një qasje më bashkëkohore dhe më të integruar, duke përfshirë tema si edukimi për zhvillimin e qëndrueshëm, qytetaria globale, edukimi mediatik dhe digjital, inteligjenca artificiale, mirëqenia sociale dhe emocionale, edukimi financiar, sipërmarrja dhe orientimi për karrierë”, tha ajo.

Kumbaro shtoi se “synimi ynë është që çdo nxënës të fitojë jo vetëm njohuri, por edhe kompetencat që i nevojiten për të menduar në mënyrë kritike, për të bashkëpunuar, për të krijuar dhe për të qenë qytetar aktiv, ndërsa vijojmë punën për rishikimin e kurrikulave për klasat II, VII dhe XI për vitin e ardhshëm”.

Burimi ATSH