Ministrja e Arsimit, Mirela Kumbaro zhvilloi sot një mbledhje pune me drejtuesit e Zyrave Vendore të Arsimit Parauniversitar, Drejtorive Rajonale të Arsimit, Qendrës së Shërbimeve Arsimore dhe Agjencisë së Sigurimit të Cilësisë në Arsimin Parauniversitar, për analizën e Maturës Shtetërore 2026.

Kumbaro theksoi se rezultatet paraprake janë pozitive me më shumë maturantë që kaluan me sukses provimet falë një pune të gjatë përgatitore të nisur që në muajin dhjetor me testet model, testet provë dhe konsultimet me nxënësit.

Po ashtu, ministrja vlerësoi se kemi më shumë vlerësime maksimale dhe i gjithë procesi u administrua me standarde të larta, transparencë dhe korrektësi.

“Natyrisht, çdo proces ka edhe sfidat e tij. Përjashtimi i 31 maturantëve për shkelje të rregullores na rikujton se integriteti i provimeve është një parim mbi të cilin nuk bëjmë asnjë kompromis. Barazia dhe korrektësia për çdo maturant mbeten themeli i Maturës Shtetërore”, tha ajo.

Kumbaro falenderoi të gjithë drejtuesit, mësuesit administratorë, monitoruesit, vlerësuesit dhe institucionet për përkushtimin që bëri të mundur zhvillimin e një Mature Shtetërore të suksesshme.