Shqipëria ka përmirësuar ndjeshëm pozicionin e saj në renditjen e Global Tax Expenditures Transparency Index (GTETI v.2.1), një indeks ndërkombëtar që mat nivelin e transparencës dhe cilësinë e raportimit të shpenzimeve tatimore në vende të ndryshme të botës.

Ministri i Financave, Petrit Malaj, bëri të ditur sot se Shqipëria është renditur në vendin e 48-të ndër 116 vende të përfshira në vlerësim, me 51.73 pikë nga 100 të mundshme.

Sipas tij, ky rezultat përfaqëson një përmirësim të ndjeshëm krahasuar me renditjen e mëparshme, ku Shqipëria pozicionohej në vendin e 74-t.

Malaj theksoi se progresi i arritur konfirmon angazhimin për forcimin e transparencës fiskale dhe përmirësimin e qeverisjes së financave publike.

Sipas Ministrisë së Financave, përmirësimi në indeks reflekton progresin e bërë në rritjen e transparencës fiskale, përmirësimin e raportimit të shpenzimeve tatimore, si dhe forcimin e menaxhimit të financave publike.

Global Tax Expenditures Transparency Index (GTETI) është një indeks ndërkombëtar që mat transparencën dhe cilësinë e raportimit të shpenzimeve tatimore (tax expenditures), si lehtësitë, përjashtimet apo incentivat tatimore që ndikojnë në të ardhurat e buxhetit të shtetit.

Indeksi vlerëson praktikat e vendeve në pesë dimensione kryesore: disponueshmërinë publike të informacionit, kuadri institucional, metodologjinë e raportimit, cilësinë e të dhënave përshkruese dhe vlerësimin e ndikimit ekonomik e fiskal të lehtësive tatimore.

Versioni i përditësuar GTETI v2.1, në Maj 2026, ka sjellë disa risi në vlerësim, me qëllim forcimin e koherencës së brendshme dhe qëndrueshmërisë së vlerësimeve.

Ky version solli kritere më të forta vlerësimi, me fokus te cilësia e raportimit; peshë më të madhe për analizën e ndikimit të përjashtimeve fiskale; standardizim më të lartë të metodologjisë, për krahasim më të drejtë mes vendeve; si dhe theks më të madh te transparenca publike dhe aksesueshmëria e informacionit. Këto ndryshime e bëjnë vlerësimin më rigoroz dhe rezultatin e Shqipërisë më domethënës në krahasim ndërkombëtar.

Ministria e Financave e konsideron këtë rezultat si një tregues pozitiv të reformave të ndërmarra në administrimin fiskal dhe në rritjen e standardeve të llogaridhënies publike.