Kalaja e Gjirokastrës vijon të mbetet një nga destinacionet turistike më të vizituara në Shqipëri.

Monumenti i njohur i kulturës dhe identitetit shqiptar po njeh një tjetër sezon të suksesshëm turistik, duke konfirmuar interesin në rritje për turizmin kulturor në jug të vendit.

Ministri i Turizmit, Kulturës dhe Sportit, Blendi Gonxhja ndau sot pamje nga Kalaja e Gjirokastrës e mbushur plot me vizitorë.

“Kalaja e Gjirokastrës vijon të mirëpresë vizitorë vendas dhe të huaj, të cilët zgjedhin të njihen nga afër me historinë, arkitekturën dhe trashëgiminë kulturore të qytetit të gurtë”, shkruan Gonxhja.

Sipas tij, “interesi i vazhdueshëm i turistëve mbetet një dëshmi e vlerave historike dhe kulturore që mbart ky monument i rëndësishëm”.

Kalaja e Gjirokastrës ndodhet e vendosur mbi një kodër pak të shkëputur nga Mali i Gjerë, e ngritur në një pikë vrojtuese rreth 370 m mbi nivelin e detit. Krahasuar me kalatë mesjetare të tjera të vendit, kjo kala është më e vogël nga sipërfaqja dhe ruhet në gjendje më të mirë. Gjerësia e saj është 75 m dhe gjatësia 500 m. Për t’u shtuar rezistencën mureve të kalasë janë ngritur pesë kulla të fuqishme.

Që në hyrje të kështjellës gjendet galeria e topave dhe një koleksion i armëve që janë mbledhur që nga fillimet e përdorimit të tyre e deri në Luftën e Parë dhe të Dytë Botërore.

/Burimi ATSH