Zëvendëskryeministrja Albana Koçiu deklaroi sot se “Konferenca Ndërqeveritare Shqipëri – BE që do të mbahet më 26 maj në Bruksel vulos me sukses fazën hyrëse dhe çel fazën përmbyllëse të negociatave të anëtarësimit”.

Në një reagim në rrjetet sociale lidhur me kalimin e raportit IBAR, Koçiu tha se “Shqipëria Europiane është një histori suksesi që e shkruajmë çdo ditë bashkë dhe që lexohet qartë në çdo tryezë të Brukselit”.

“Përballë çdo tentative për të nxirë imazhin e vendit, përballë çdo përpjekjeje politike për të baltosur arritjet tona të përbashkëta dhe për të bllokuar progresin, puna fiton gjithmonë, Shqipëria fiton gjithmonë”, tha Koçiu.

Zv/kryeministrja Koçiu u shpreh se “kjo është një ditë krenarie për çdo institucion, për skuadrën Shqipëria 2030 dhe për çdo shqiptar që beson se ky vend i ka të gjitha mundësitë për t’u ulur si i barabartë mes të barabartëve në familjen e madhe europiane”.

Vendet e Bashkimit Europian dhanë mesditën e djeshme dritën jeshile për miratimin e raportit të IBAR-it për Shqipërinë, duke shënuar kështu një hap shumë të rëndësishëm në procesin e negociatave të anëtarësimit.

Konferenca Ndërqeveritare Shqipëri-BE cilësohet një nga momentet kyçe të procesit të zgjerimit, pasi i hap rrugë avancimit teknik dhe politik të negociatave dhe përshpejtimit të mbylljes së kapitujve negociues.

Burimi ATSH